ශ්‍රී ලංකා රජරට විශ්වවිද්‍යාලයීය භාෂා අධ්‍යයනාංශය විසින් සංවිධානය කෙරෙන “දිය කැට පහණ මංගල දියවර – 2022” නිර්මාණ හා සාහිත්‍ය විචාර තරගයේ සම්මාන ප්‍රදාන රාත්‍රිය 2022 මාර්තු මස 22වන දින පස්වරු 6.00 සිට ශ්‍රී ලංකා රජරට විශ්වවිද්‍යාලයීය එළිමහන් රංගපීඨයේදී පැවැත්වේ. ශ්‍රී ලංකා රජරට විශ්වවිද්‍යාලයීය ගරු උපකුලපතිතුමිය, සියලු පීඨාධිපතිවරුන්, සමාජීයවිද්‍යා හා මානව ශාස්ත්‍ර පීඨයේ සියලු අංශාධිපතිවරුන්, ආචාර්යවරුන්, විද්‍යාර්ථීන් ඇතුළු විශාල පිරිසකගේ සහභාගීත්වයෙන් පැවැත්වෙන මෙම සම්මාන ප්‍රදාන රාත්‍රිය ප්‍රවීණ රංගධර සතිස්චන්ද්‍ර එදිරිසිංහ, ප්‍රවීණ රංගධර රොඩ්නි වර්ණකුල, විශාරද තිස්ස ජයවර්ධන ඇතුළු ආරාධිත අමුත්තන්ගේ විශේෂාංවලින් වර්ණ ගැන්වෙනු ඇත. මෙදින දිය කැට පහණ ගායන තරග අංශයේ අවසාන වටය සජීවී තරගයක් ලෙස පැවැත්වීමට නියමිත අතර, තරගකරුවන් රැසක් අතුරින් අවසාන මහා වටයට සුදුසුකම් ලද විද්‍යාර්ථීන් සය දෙනෙකු දිය කැට පහණ ගායනාභිෂේකය සඳහා තරග වදිනු ඇත. සම්මාන ප්‍රදාන රාත්‍රිය මෙහෙයවන්නේ ජනප්‍රිය නිවේදන ශිල්පී හේෂාන් මල්ලව (Red Mic) විසිනි.
